Supsidio pa training, guia i konseho profeshonal pa empresario chikí i mediano
E programa ta akapará instrumentonan di supsidio di kostonan di análisis i guia ku mira riba stimulashon di kresementu di empresanan chikí i mediano, resultando den un sektor mas duradero. E programa aki ta keda ehekutá den kuadro di e programa di Inisiativa Sosial‐Ekonómiko (SEI).
Ku e servisio aki Kámara di Komèrsio ta asistí mas tantu empresario pa éksitosamente solushoná opstákulonan ku ta stroba nan di yega na un kresementu di nan empresa. E programa lo konsistí di seshonnan di intake, análisis di situashon di kompania i formulashon di strategia i implementashon di plan di ekspanshon. E asistensha ta tuma lugá kontra tarifanan supsidiá.
Training:
Empresarionan por haña konosementu i téknikanan básiko i avansá di hasi negoshi. Trainingnan genériko i spesífiko lo keda duná segun e demanda di (futuro) empresanan chikí i mediano i lo ta basá riba e nesesidatnan ku tin manera por ehèmpel abilidatnan empresarial, maneho general, maneho di eksportashon, plan stratégiko, belasting, plan di negoshi, ICT, etc.
Servisio di guia i konseho:
Guia pa (futuro) empresarionan chikí i mediano lo keda ofresé na empresarionan lokal pa mehorá nan abilidatnan empresarial. Empresarionan por haña guia riba tereno di merkadeo, maneho finansiero, konseho riba tereno di atministrashon i organisashon, aspektonan legal, diseño gráfiko i página web, aspektonan tékniko, rekurso humano, komunikashon, inovashon, desaroyo personal, maneho di eksportashon, belasting i otro áreanan spesífiko. Kámara di Komèrsio tin akuerdo ku vários konsehero profeshonal ku ta traha riba un base freelance.
Ken por apliká?
Empresanan chikí i mediano lokal establesé kaba, esun ku a kaba di kuminsá i esun ku ta bai kuminsá un negoshi den tempu kòrtiku ku ke risibí konseho na momentu di start un negoshi, solushoná un problema ku nan ta eksperensiá den nan kompania òf si nan ke profeshonalisá nan empresa.
Ken ta kualifiká komo empresario chikí i mediano?
Empresario Chikí:
Pa kualifiká komo empresario chikí, e empresa mester tin un máksimo di 10 empleado (trahando por lo ménos 20 ora pa siman) miéntras benta di e empresa no ta surpasá 500 mil florin pa aña.
Empresario mediano:
Pa kualifiká komo empresario mediano, e empresa mester tin entre 10 ku 50 empleado (trahando por lo ménos 20 ora pa siman) miéntras benta di e empresa no ta surpasá 1 mion florin pa aña.
Kon pa apliká?
Yama òf pasa na Kámara di Komèrsio of traha un sita pa un entrevista personal. Si durante e entrevista personal resultá ku e kliente tin un área spesífiko den kua e mester di mas konseho i guia, Kámara di Komèrsio por tresé den kontakto ku un profeshonal den e materia ku durante un tempu definí lo konseh'é i gui’é. E profeshonal i e kliente ta firma un akuerdo den kua ta definí kontenido i durashon di e servisio. E servisio aki lo kosta e empresario ANG 40,- pa ora. E tarifa aki ta un tarifa supsidiá. E empresario mester paga, na momentu ku e firma e akuerdo, 40% di e suma total di e konsulta, ku ta basá riba e kantidat di ora durante kua e profeshonal lo guia e empresario.
Benefisio di e servisio di konseho i guia profeshonal
E servisio aki ta hopi favorabel pa (futuro) empresarionan chikí i mediano, ya ku na e manera aki nan ta haña asistensia riba e tereno ku nan mester riba un base personal. Ademas 60% di e gastunan pa konseho ta keda supsidiá pa medio di e Programa pa Garantisá Kontinuidat di Empresa Chikí i Mediano.
Pa apliká via di e website aki, klik aki: Aplika >